மஞ்சளின் சிவப்பு

தொடர்ந்து பல நாட்களாய்
நாசியில் தங்கியிருந்தது
மஞ்சள் மணம்
வருவோர் போவோரெல்லாம்
கன்னங்களில் அப்பியது
போக 
மிகப்பிடித்த பூத்துவாலையில்
எவரோ கைதுடைத்தும்
போயிருந்தனர்
ஆளரவமில்லா பகல்பொழுதில்
புத்தகம் திறந்து அமர்ந்தபோது
நுனிகளில் மஞ்சள் படிந்த
பத்திரிகைகள் வந்திருந்தன
அசந்தர்ப்பமாய் நினைவு வந்தது
அரவம் புகாதிருக்க
கல்லுப்பும் மஞ்சளும்
வேலி சுற்றிக் கொட்டிய நாள்
மெல்ல மெல்ல
கழுத்திலேறும் கொடியில்
மஞ்சள் பூசியது
ஒரு ஆண்மகன்தான்
நானே கண்டிருந்தேன்
இப்போது மிக நெருக்கத்தில்
இன்னும் இன்னும் மஞ்சள்
தலையணை முழுக்கவும்தான்
அந்த நாள் இரவு
வெண்சீலை தந்து
உடுத்திக் கொள்ளச் சொன்னவள்
மறுநாள் விடியலில்
தேடியது மஞ்சளின் ஊடே
கலந்திருந்த
சிவப்பை மட்டுமே