சிவந்தவன்

சிவப்பான மணமகன்தான்
வேண்டுமென்பது மட்டுமே
அவள் ஒரே கோரிக்கை
அவனாகியவனது 
முன்பக்கம் உள்வாங்கிய சிகை
குச்சிக்குச்சி கை கால்கள்
பியர் உபய தொப்பை
பெண்களென்றால் கிறக்கம்
(வயது தேவையா என்ன)
கத்தாழை நெடி
எதுவும் பொருட்டில்லை அவளுக்கு
நிறைய பவுனும்
ஒரு காரும் போதும்
அவளின் பொறியியல் பட்டம்
பிறந்தநாள்தோறும் ஆதரவற்றோருக்கு
அவளிடும் அன்னதானம்
அடிப்பிரதட்சணம்
எண்ணற்ற விரதங்கள்
அல்சர் வந்த காரணங்கள்
நிறைய ஃபேசியல்கள்
எல்லாம் தந்தது அவனை
கார்வண்ணத் தகப்பனே
நிறஞ்சொல்லித் திட்டிய நொடிதான்
இத்தனை இறுகியிருக்க
வேண்டுமவள்