அடைப்புக்குறி கால்கள்

அத்தனைப் பெரிய
இஸ்திரிப்பெட்டியைத் தூக்கியழுத்தி
நாளெல்லாம் நின்றபடி
வேலை செய்யும்
அவரின் கால்கள்
இரண்டு அடைப்புக்குறிகள் போல்
வளைந்திருக்கும்
கரிமூட்டை தோளில் சுமந்து
நடந்து வருகையில்
வித்தியாசம் நன்றாகவே
தெரியும்
சுற்று வட்டாரத்தில்
எந்தச் சிறுமி பூப்பெய்தினாலும்
அவரே முதல் சேலை
தருவார் உடுத்திக் கொள்ள
சம்பிரதாயமாம்
பூப்பெய்தி பல வருடங்கள்
கழிந்திருந்த நாளொன்றில்
அவர் மகள்
விடமருந்தி மரித்திருந்தாள்
ஜாதி மாறி
காதலித்திருந்தாளென
ஊருக்குள் பேச்சு
அவளின் இறுதிச் சடங்கில்
மவுன உயிராய்
ஒருவன் நின்றிருந்தான்
மதிலோரத்தில்
அடுத்த வாரம்
நடக்கவிருந்த திருமணத்திற்கு
அவளுக்காய் நிச்சயமாகியிருந்த
மாப்பிள்ளை அவனென
எல்லாரும் கிசுகிசுத்தனர்
பிணம் தூக்கும் முன்
மடித்துக் கட்டிய வேட்டியில்
தெரிந்தது
அவன்
அடைப்புக்குறி கால்கள்