எண்ணிக்கை மறந்த காதல்கள்

இத்தனைக் காதல்களை 
வைத்துக் கொண்டு 
என்ன செய்வது 

அன்பிலாழ்ந்த விண்ணப்பங்கள் தந்தும் 
இருக்கும் பெருமைகள் சொல்லியும் 
இல்லாத வலிமைகள் சுட்டியும் 
அற்புதமேபோல் உருவகித்தும் 
அசாத்திய பொறுமை கொண்டும் 
சமரசமில்லா இரக்கம் யாசித்தும் 

கச்சிதமாய் நகர்த்தி
மையப்புள்ளி வைத்து 
மனதோடு உடலும் 
சுட்டுப் பொசுக்கி 
வாசம் புகையும் துப்பாக்கியில் 
பூந்தோட்டாக்கள் ரொப்பி 
மற்றுமொரு இலக்கு 
நிர்ணயம் செய்தும் 
எண்ணிக்கையில் தீரா 

இத்தனைக் காதல்களை 
வைத்துக் கொண்டு 
என்னதான் செய்வது 
காதலைத் தவிர