சுவை மாறிய கனிகளும் அவற்றின் கரிப்பும்

தேடல்கள் முடித்திட்ட 
தடித்த என் வேர்களின் மீது 
வந்தமர்கிறான் 
கண்ணீருடன்

புறக்கணிப்போ
தோல்வியோ
துரோகமோ
இயலாமையோ
தன்னிரக்கமோ
ஏளனப்பட்ட அன்போ
மீட்க முடியா மானமோ
இங்கிவனை அமர்த்தியிருக்கலாம்

என் இலைகளின் ஸ்பரிசம்
என் மலர்களின் வாசம்
என் கிளைகளின் நடனம்
என் முழுமையின் நிழல்
பரிசளிக்கிறேன்

என் இருப்பின்
உணர்வே அற்றவனாய் விரைபவனின்
கண்ணீர் தடமும் வெப்பமும் என்
நாளைய கனிகளில் சேகரிக்கிறேன்

சுவைமாறி கரிக்கும் கனிகள்
இனி எனதென முடிவாகும்
அவனும் அடையாளம்
காணும் வகையில்