தெரியாமலேயே போயிடுச்சு

கண்ணாலத்துக்குக்  கட்டுன 

கூறைப்புடவை எடுத்து 

உத்தரத்துக்  கழியில 

இறுக்க முடிச்சுபோட்டு 

ஒண்ணுக்கு ரெண்டு வாட்டி 

இழுத்து பலம்  பாத்து 

புள்ளயக் கெடத்த 

சரியான உசரம் வெச்சு 

அம்சமான தூளி ஒண்ணை 

நல்ல நேரத்திலக் கட்டி 

பழைய பருத்தித்துணியில 

பொறந்த சிசுவைப்  பொதிஞ்சு 

ஒருகையில புள்ளைய ஏந்தி 

மறுகையில தூளி வெலக்கி 

தூங்கறப்  புள்ளைய 

அலுங்காம சாய்ச்சி 

காத்தோட்டத்துக்கு 

நடுவுல கட்டை வெச்சு 

பூமேல பூ வெக்கற மாதிரி 

மெலுக்கா ரெண்டு ஆட்டு ஆட்டி 

சன்னமா ஒரு பாட்டையும் பாடி 

எல்லாம் முடிஞ்சுதுன்னு 

சமையக்கட்டு பக்கம் போனா 

தரையில ஈரக் கோலம் போட்டு 

சிணுங்கறப்  புள்ளைய

வாரியெடுத்து பால் 

குடுக்குற சுகமெல்லாம் 

ராவெது பகலெது தெரியாம 

எதையோ தொலைச்சு 

என்னென்னமோ  வாங்க 

வம்பாடுபட்டு ஓடி ஓடி ஒழைக்கிற 

நகரத்துக்கு வாக்கப்பட்ட 

எம் மவளுக்கு 

தெரியாமலேயே போயிடுச்சு