இல்ல வனம்

எந்நேரமும் உதிர்ந்துவிடும்
அபாயத்துடன் 
கம்பியிலாடும் நீர்த்துளியாய்
யோசித்து யோசித்து
மலையேறிக் கொண்டிருந்தவளை
கைநீட்டித் தடுத்தவர்
வனம் எங்கிருந்து துவங்குவதாய்
வினவுகிறார்

எந்த அறிவிப்புப்பலகைகளையும்
நம்புபவர் இல்லை போலும்
இவளைப் போலவே

வனத்தின் முடிவு
எங்கிருந்து தொடங்கும்
என்பதை மட்டுமே
அறிந்தவள் அவளென்பதை
எந்த வனமும் மறுப்பதில்லைதான்

தம் இல்லத்திலிருந்தே
தன் வனம் தொடங்கிவிட்டதாய்
பதில் சொன்னவளைக் கண்டு
அவர் விழிகள் ஏன்
அத்தனை படபடத்தன
மலரிலிருந்து வழி தவறிய
ஒரு தேன்சிட்டு போல

தொலைந்து போனவர்கள்
பட்டியலில் மேலும்
இரு பெயர்கள் சேர்வதற்கான
சாத்தியங்கள் இருந்ததை
இருவருமே உணர்ந்தனர்
ஆம்
தொலைந்தது பெயர்கள்
மட்டுமே என்பதையும்
இருவரும் அறிவர்