ரிஸ்வன் லவ்ஸ் சலோமி

அடர்ந்த வனம்போலும்
சூழலிடையில் 
பூட்டியக் கதவுகளின் பின்
கூப்பியக் கரங்களுடன்
அனுமன்
பல்வேறு ப்ரார்த்தனைகள்
துண்டுக்காகிதங்களில்
மாலைகளாகக் கிடக்கின்றன
கம்பிக்கதவிடையே தரிசித்து
ஆழ்ந்து ஸ்வாசித்து
மொத்தமாய் நிரப்பிக்கொண்டேன்
கருவறை வாசம்
இந்த வாசம் நுகரும்
நொடிகள் மட்டும் ஏன்
உள்ளெல்லாம் மணக்கிறது
சிறுகோயில் சுற்றிவர
சுவரெல்லாம் கிறுக்கல்கள்
தேர்வில் மதிப்பெண் பெறவும்
உலகம் உய்யவும்
காதல் கைகூடவும்
சரிதான்
அனுமனுக்கேற்ற வேலைதான்
எனினும்
கணையாழி தந்துச் சென்றனரோ
அவனிடம்
தெரியவில்லை
பளிச்சென பெரிய
எழுத்தில் மின்னிய ஒன்று
மிக வசீகரித்தது
ரிஸ்வன் லவ்ஸ் சலோமி