சுலப மழை

மழைக்கவிதைஎழுதுவது
அத்தனை சுலபமில்லை
பொழியத் தொடங்கியதும்
பெருநகரப் பிற இரைச்சலில்
மழையோசை கேட்பதில்லை
மண்வாசம் வருவதற்கு
வாய்ப்பேயில்லை
எங்கோ சமையலறை மூலை
இருப்பவளை ஈரக்காற்று
உசுப்பியெழுப்பும்
தொடர்ந்தும் ரசிக்க இயலாது

உலர்ந்த துணிகளும்
காயவைத்த
மிளகாய் வற்றலும் அள்ளி
மொட்டுவிட்ட ரோஜாச்செடி
பெருமழையில் உடைந்திடாது
பாதுகாத்து
மழையில் செல்லாதவாறு
மகவைக் கட்டுப்படுத்தி
ஜன்னல் கதவுகள்
காற்றில் அறையாதிருக்க
கொக்கிகள் மாட்டும் வேளை
மழை ரசிக்கக் கிடைக்கும்
சில வரிகளைத் தூறிச் செல்லும்
எழுத எத்தனிக்கும் வேளை
எங்கிருந்தோ வரும்
தேநீர் கொதிக்கும் வாசம்
சமையலறை இட்டுச் செல்லும்
மறுபடியும்
எனினும்
ஒருகையில் தேநீர் கோப்பையும்
மறுகையில் நின்றுபோன மழையுமாய்
மழைக்கவிதை எழுதுவதுதான்
எத்தனை ரம்மியமாய்
அமைந்து விடுகிறது